هەواڵ

وه ک هه‌موو رۆژێکی­تر/ره‌حیم عه‌بدولڕه‌حیم زاده

Rahim

وه ک هه‌موو رۆژێکی­تر

ره‌حیم عه‌بدولڕه‌حیم زاده

(۱)

ئه‌و رۆژه‌ش وه‌ک هه‌موو رۆژه‌کانی­تر کاتێ پ.د له خه‌و هه‌ستا به پێی خووی له مێژینه‌ی بیست و چه‌ن ساڵه‌ی، خۆی حازر کرد و وه‌ده‌ر که‌وت، تا نه‌گه‌یشته سه‌ر چوارێیانه‌که بۆ چرکه‌یه‌کیش بیری له‌وه نه‌کردبۆوه که له رێگا هه‌میشه‌ییه‌که‌ی لادا و به پێی ئاواتی بیست و چه‌ن ساڵه‌ی به رێیه‌کی­تردا بڕوا به‌ڵام له ژیانی هه‌ر که‌سێک­دا چرکه ساتێکی وا هه‌یه که تۆ بتهه‌وێ یاساکانی ژیانت تێک ده‌ی، ته‌نانه‌ت له ژیانی ئه‌ودا که ئه‌و هه‌مووه پابه‌ندی یاساکانی ژیانی بوو. هه‌ر بۆیه بۆ یەک چرکه له ناوه‌راستی چواررێیانه‌که وێستا و بیری کرده‌وه، ته‌نانه‌ت ده‌نگی سیگناڵی ماشێنه‌کانیش وه‌خۆی نه‌هێناوه تا ئه‌ کاته‌ی خۆی بڕیاری دا رێ که‌وێته‌وه و وای بڕیار دا ئه‌مجاره‌یان رێگاکه‌ی بگۆڕێ، کاتێکیش ئه‌م بڕیاره‌ی دا گوێی بۆ قسه و جنێوی که‌س رانه‌داشت و یه‌کسه‌ر رێگاکه‌ی گرته به‌ر.

نه‌ک ئه‌وه‌ی پێشتر ئه‌م شه‌قامه‌ی نه‌دیتبێ، به‌ڵام ئه‌م جاره‌یان هه‌ستی ده‌کرد له هه‌موو کاتێ تازه‌تره، وه‌ک ئه‌وه‌ی بۆ یه‌که‌م جار بێ هاتبێته شارێکی غه‌ریب چاوی بڕیبووه دووکانه‌کان که تازه خه‌ریک بوون ده‌کرانه‌وه. چاوی له نووسراوه‌ی یه‌که‌ یه‌که‌ی تابڵۆکان ده‌کرد، له سیمای خه‌ڵک ورد ده‌بۆوه و هه‌ستی ده‌کرد نامۆ و نائاشنان.

بۆ یه‌که‌م جار پێی وابوو دره‌نگیش بگاته سه‌رکار هیچ نییه، دوای بیست و دوو ساڵ و سێ مانگ و حه‌فده رۆژ خزمه‌تی دڵسۆزانه ئه‌و حه‌قه‌ی به خۆی ده‌دا رۆژێک دره‌نگ بگاتێ و لۆمه نه‌کرێ. دوایی بیری له‌وه کرده‌وه که ئه‌م دره‌نگ که‌تنه‌ی چۆن له سه‌ر کار ده‌ته‌قێته‌وه و باسی ده‌کرێ، هه‌موو واقیان وڕ ده‌مێنێ و به گوێی یه‌کتری­دا ده‌یچرپێنن، هه‌ستی به شاز بوون ده‌کرد هه‌ر بۆیه هه‌نگاوه‌کانی شلتر کرده‌وه‌ تا زیاتر چێژ له‌و هه‌سته‌ی وه‌رگرێ.

له گه‌ڵ پیاسه‌یه‌کی ئارام بیری له‌وه‌ ده‌کرده‌وه که ده‌بوو ئه‌م چێژه‌ی زووتر تاقی کردباوه، هه‌ر بۆیه په‌ژیوانییه‌کی دوور و قووڵ که‌وته ناخییه‌وه، بیری له هه‌موو ئه‌و رۆژه بۆشانه ده‌کرده‌وه که هام و شۆی له ئیداره به‌ره‌و ماڵ و له ماڵ به‌ره‌و ئیداره‌ی به‌م جۆره دووپاته‌یه بووه. هێنده په‌ژیوان بوو که جار جار له جێی خۆی راده‌وه‌ستا و له شتێکی نادیار راده‌ما، خه‌ڵک به سه‌رسووڕمانه‌وه چاویان لێ ده‌کرد به‌ڵام ئه‌و ئاگای له که‌س نه‌بوو. بۆ ئه‌وه‌ی چێژ له پیاسه‌که‌ی وه‌رگرێ حه‌ولی دا هه‌موو ئه‌م بیرانه له خۆی دوور خاته‌وه به‌ڵام ئه‌مجار هه‌ستی به ترس کرد. ترس له‌وه‌ی دوای بیست و دوو سال و سێ مانگ و حه‌ڤده رۆژ خزمه‌تی دڵسۆزانه به شه‌پێک وه‌ده‌ری نێن، ئه‌ویش له سه‌ر شتێکی ئاوا منداڵانه و له رۆژێکی ئاوا منداڵانه‌دا. هه‌ستی کرد پیر بووه و خه‌ریکه ده‌خه‌ره‌فێ. بێ ئه‌وه‌ی خۆی بیهه‌وێ ئاهه‌نگی هه‌نگاوه‌کانی توند ده‌بۆوه و دڵه‌خورپێ دایده‌گرت، به‌ڵام هه‌ر که وه‌بیری ده‌هاته‌وه که وه‌ک قاره‌مانێکی ئازا رووبه‌رووی یاساکانی ژیانی خۆی هیچ، رووبه‌رووی هه‌موو یاساکانی ئیداره راوه‌ستاوه، دیسان هێزی ده‌هاته‌وه به‌ر و سه‌یری شته ئاڵ و واڵاکانی نێو ویترینی دووکانه‌کان ده‌کرد.

بۆ ئه‌وه‌ی جێژنه‌که‌ی هێندێ ره‌نگین کا جگه‌ره‌یه‌کی هه‌ڵکرد و به چێژێکی زۆره‌وه یه‌که‌م مژی لێ دا،ئه‌و کاته‌ی به چێژه‌وه مژی له جگه‌ره‌که ده‌دا بیری له هه‌موو شتێ ده‌کرده‌وه جگه له مه‌رگ. مژی دووهه‌میشی لێ دا به‌ڵام جگه‌ره‌که له ده‌ستی به‌ر بۆوه و چه‌ن تلی له سه‌ر ئاسفاڵتی شه‌قامه‌که خوارد تا تگه‌ری ماشێنێک پانی کرده‌وه. ئه‌و له کاتێک­دا دووکه‌ڵی جگه‌ره‌که خه‌ست خه‌ست له ده‌میه‌وه ده‌هاته ده‌رێ ته‌نیا توانی بیر له‌وه بکاته‌وه: بریا هه‌ر به رێی هه‌موو رۆژه‌ی دا رویشتبا.

(۲)

ئه‌و رۆژه کاتێ پ.د له خه‌و هه‌ستا دوو هه‌ستی دژواز له ده‌روونی دابوو. بۆ ئه‌و زۆر گرینگ بوو به‌یانیان به چ هه‌ستێ له خه‌و هه‌ستێ، چون بڕوای وابوو ئه‌م هه‌سته کاردانه‌وه‌ی له هه‌موو ئاکاری رۆژانه‌ی دا ده‌بێ. ئه‌و رۆژه له هه‌موو رۆژه‌کانی­تر سه‌یرتر بوو. هه‌ستی به دوو شتی ته‌واو جیاواز ده‌کرد، له گه‌ڵ ئه‌وه‌ی هه‌ستی به شادییه‌کی دوور ده‌کرد له هه‌مان کات­دا دڵه‌خورپه‌یه‌کی سه‌یر دایگرتبوو، به‌ڵام حه‌ولی دا ئه‌م دژوازییه له بیر خۆی به‌رێته‌وه و گوێی نه‌داتێ. وه‌ک هه‌موو رۆژه‌کان­یتر به پێی خوویه‌کی له مێژینه‌ی بیست و چه‌ن ساڵه خۆی ساز کرد و وه‌ده‌ر که‌وت.

بیست و دوو ساڵ و سێ مانگ و حه‌فده رۆژ هه‌ر ئه‌م رێگایه، یانی زیاتر له هه‌شت هه‌زار رۆژ، زیاتر له شازده هه‌زار جار ئه‌م رێگایه‌ی پێوا بوو. هه‌موو جارێ به خۆی کوتبوو ئه‌م جار له‌م رێگا هه‌زار پاته‌یه لاده‌ده‌م و به رێیه‌کی­تردا ده‌رۆم، به‌ڵام هه‌موو جارێ له به‌ر هۆیه‌کی نادیار دره‌نگی ده‌خسته‌وه و ئه‌مڕۆ و سبه‌ینێی پێ ده‌کرد. ئه‌و کاته‌ی لاوتر بوو هێندێ هۆی ورد و درشتی بۆ ریز ده‌کرد به‌ڵام دواترکه هێندێ گه‌ڕاوه هه‌ستی کرد ئه‌م کاره بێهووده‌یه، به‌ڵام ئه‌و که‌ڵکه‌ڵه‌یه هه‌ر له دڵی­دا ماوه.

وه‌ک هه‌موو جارێ له سه‌ر چوارێیانه‌که به حه‌سره‌ته‌وه چاوێکی له ده‌ور و پشتی کرد به‌ڵام به شه‌که‌تییه‌وه درێژه‌ی به رێگا هه‌میشه‌ییه‌که‌ی خۆی دا. هه‌ستی ده‌کرد هه‌موو دووکانه‌کان،سیماکان و ته‌نانه‌ت سه‌گه به‌ڕه‌ڵڵاکانی ناو شه‌قامیش بۆی ئاشنان. هه‌ر له‌و شوێنه‌ی هه‌میشه جگه‌ره‌یه‌کی داگیرساند. یه‌که‌م مژی وه‌ک عاده‌ت و به بێ هیچ چێژێک هه‌ڵمژت، هه‌ستی ده‌کرد یه‌که‌ یه‌که‌ی رۆژه‌کانی ته‌مه‌نی وه‌ک دووکه‌ڵی ئه‌م جگه‌ره‌یه به با داوه. حه‌زی ده‌کرد رۆژێک له هه‌موو یاساکانی ژیانی یاخی بێ به‌ڵام پێی وابوو له‌وه پیرتره که بیر له یاخی بوون بکاته‌وه. هه‌ر بۆیه مژی دووهه‌می به حه‌سره‌ته‌وه لێ دا، بیری له‌وه ده‌کرده‌وه پیر بووه و له مه‌رگ نزیک بۆته‌وه.

جگه‌ره‌که له ده‌ستی به‌ر بۆوه و له سه‌ر ئاسفاڵتی شه‌قامه‌که چه‌ن تلێکی خوارد تا تگه‌ری ماشێنێک پانی کرده‌وه. دووکه‌ڵی جگه‌ره‌که له ده‌می­دا په‌نگی خوارده‌وه و هه‌رگیز نه‌یتوانی ده‌رباز بێ و ئه‌و ته‌نیا توانی بیر له‌وه بکاته‌وه که بریا ئه‌و رۆژه به‌و هه‌سته دژوازانه‌وه هه‌ر له ماڵ ده‌ر نه‌که‌وتایه.

(۳)

ئه‌و رۆژه کاتێ پ.د له خه‌و هه‌ستا هه‌ستی کرد ئێجگار ماندووه و داهێزراوه. ته‌نانه‌ت پێی خۆش نه‌بوو وه‌ک هه‌موو رۆژێ خۆی ساز کا و به‌ره‌و ئیداره رێ که‌وێ، به‌ڵام هه‌ر چۆنێک بوو خۆی رازی کرد به پێی خووی له مێژینه‌ی بیست و چه‌ن ساڵه‌ی خۆی ساز کا، به‌ڵام دوای هه‌موو ئه‌م کارانه‌ش دیسان هه‌ستی به وه‌ڕه‌زی و ماندووییه‌کی زۆر ده‌کرد هه‌ر بۆیه هه‌روا به جل و به‌رگی ده‌رێوه خۆی له سه‌ر جێ و بانه‌که‌ی به عه‌رز دادا. بۆ ماوه‌یه‌کی کورت چاوی قووچاند به‌ڵکوو ئه‌و وه‌ڕه‌زییه له گیان و مێشکی بڕواته ده‌رێ به‌ڵام هه‌ر چاوقووچاندنێک سه‌ره‌تای بیرکردنه‌وه‌یه‌کی دوور و درێژه:  ئه‌و هه‌میشه و له هه‌موو ئه‌م بیست و دوو ساڵ و سێ مانگ و حه‌فده رۆژه‌دا پێی خۆش بوو هه‌ر هیچ نه‌بێ رۆژێک له ماڵێ بمێنێته‌وه و به ئاره‌زووی دڵی خۆی هه‌ڵسووڕێ، کار بکا، کتێب بخوێنێته‌وه، گوێ له رادیۆ بگرێ یان هه‌ر کارێکی­تر که پێی خۆشه و ئێستا ئه‌و هه‌له‌ی بۆ ره‌خساوه، له ماڵه ته‌نیاکه‌ی خۆی که ساڵه‌ها بوو ته‌نیا ده‌نگی خۆی تێیدا زرینگابۆوه.

ئه‌م جار بیری کرده‌وه چ بکا: ده‌ستی دا کتێبێک بیخوێنێته‌وه، به‌ڵام چه‌ن چرکه‌یه‌ک ته‌نیا به‌وەڕه‌زییه‌وه هه‌ر لاپه‌ڕه‌کانی ئه‌م بار ئه‌و بار کرد. پێچی رادیۆکه‌ی بادا، ده‌یان ده‌نگ له هه‌موو گۆشه‌کانی دونیاوه به یه‌که‌وه هوروژمیان بۆ هێنا و ئه‌و نه‌یتوانی گوێ بداته هیچیان هه‌ر بۆیه دیسان راکشا تا بیر بکاته‌وه، ئه‌و کاره‌ی به درێژایی هه‌موو شه‌وه تاریکه‌کان ده‌یکرد:

بڵێی ئه‌مڕۆ له شه‌قام یان له ئیدارە ئاڵ و گۆڕێک رووی نه‌دابێ، دواتر بیری له‌ شه‌قامانه کرده‌وه که پێیان­دا تێده‌په‌ڕێ و هه‌موو ئه‌و کارانه‌ی له ئیداره ده‌یکا. هه‌ستی کرد هه‌موو ئه‌م پیاسه هه‌زار پاته و ئه‌و کاره هه‌زار پاته‌ی ئیداره و ته‌نانه‌ت بیر کردنه‌وه له‌وان خه‌ریکه چێژی ده‌داتێ و ئه‌م هه‌سته ترساندی. به ده‌م ترس و بیر کردنه‌وه جگه‌ره‌یه‌کی داگیرساند و مژی یه‌که‌می لێ دا و بۆ یه‌که‌م جار بیری له ته‌نیایی خۆی کرده‌وه، له‌وه‌ی که ده‌یتوانی ته‌نیا نه‌بێ. مژی دووهه‌می لێ دا، به‌ڵام له ناکاو جگه‌ره‌که له ده‌ستی به‌ربۆوه و له سه‌ر فه‌رشه کۆنه‌که چه‌ن تلێکی خوارد تا تگه‌ری ماشێنێک پانی کرده‌وه.

دووکه‌ڵی جگه‌ره‌که ئاوێته‌ی بۆنی شێی دیوه‌که بوو و ئه‌و بیری له‌وه نه‌کرده‌وه ئه‌م ماشێنه چۆن هاتۆته دیوه‌که‌ی و خۆی لێ داوه، ته‌نیا توانی بیر له‌وه بکاته‌وه که بریا هیچ کات هه‌ستی به ماندوویی نه‌کردبا و هه‌ر چۆن بایه له ماڵێ ده‌رکه‌وتبا، ئه‌گه‌ر هه‌ر ماندووش بوو ماشێنێکی گرتبایه تا ئیداره.

(۴)

ئه‌و رۆژه‌ش وه‌ک هه‌موو رۆژه‌کانی تر پ.د سه‌ری سه‌عات له خه‌و هه‌ستا، به‌ڵام هه‌ستی کرد ده‌بێ هێندێ زیاتر بخه‌وێ. هه‌ر به ده‌م خه‌وه‌وه بیری کرده‌وه ده‌کرێ تاکسی بگرێ بۆوه‌ی دره‌نگ نه‌گاته ئیداره. زۆر خه‌و نه‌یبرده‌وه به‌ڵام دوای ساڵه‌های ساڵ که خه‌ونی نه‌دیبوو به‌ ده‌م خه‌ونێکی ترسێنه‌ره‌وه راپه‌ڕی. له گه‌ڵ ئه‌وه‌ی به پێی خووی بیست و چه‌ن ساڵه‌ی خۆی ساز ده‌کرد بیری له‌و خه‌ونه ناخۆشه‌ی به‌ره‌به‌یان ده‌کرده‌وه: چوار که‌س که هه‌ر چواریان هه‌ر خۆی بوون بن داره‌ مه‌یتێکیان گرتبوو که هه‌ر خۆی له سه‌ری راکشابوو و هه‌ر خۆشی سه‌یری هه‌موو ئه‌وانه‌ی ده‌کرد و له بوولێڵی به‌یانی به‌ره‌و گۆڕستانی شار ده‌چوون و هه‌ر چوار که‌سه‌که جگه‌ره‌یه‌کیان به لالێوه‌وه بوو.

ویستی زۆر گوێ نه‌داته خه‌ونه‌که‌ی به‌ڵام ئه‌و خه‌ونه سه‌ره‌تای ئه‌و رۆژه‌ی ته‌واو لێ تاڵ کردبوو و بۆ ئه‌و زۆر گرینگ بوو که رۆژ به چ هەستێکه‌وه ده‌ست پێ بکا. به ترس و دڵه‌خورپه‌ی خه‌ونه‌که‌یه‌وه ده‌ستی له تاکسییه‌ک هه‌ڵێنا و سوار بوو. شۆفیره‌که قسه‌ی ده‌کرد و ئه‌و بێ ئه‌وه‌ی گوێی بداتێ سه‌ری بۆ ده‌له‌قاند. له سه‌ر چواررێیانه‌که له پشت چرای سوور راوه‌ستان و ئه‌و چاوێکی له ده‌ور پشتی خشاند، هه‌ر هه‌موو ئه‌و شته دووپاتانه، ته‌نانه‌ت له پشت شووشه‌ی ماشێنه‌که‌ش هه‌ستی به جیاوازییه‌ک نه‌ده‌کرد. کاتێک ماشێنه‌که رێ که‌وته‌وه بیری ده‌کرده‌وه‌ بۆ له ته‌واوی ئه‌و بیست و دوو ساڵ و سێ مانگ و حه‌فده رۆژه‌دا جارێکیش چییه به ماشێن هام و شۆی نه‌کردووه؟ هه‌میشه بیری له‌وه کردبۆوه به‌ڵام ئێستا که سوار ببوو ده‌یدی هێنده‌ش شتێکی سه‌یر نییه و چێژێکی ئه‌تۆشی نییه. شۆفیره‌که جگه‌ره‌یه‌کی هه‌ڵ‌کردبوو و قسه‌ی ده‌کرد به جگه‌ره‌ی شۆفیره‌که ئه‌ویش ئیشتیای چوو جگه‌ره‌یه‌ک هه‌ڵکا، مژی یه‌که‌می لێ دا و بیری کرده‌وه له ته‌واوی ئه‌م بیست و چه‌ن ساڵه‌دا ده‌یتوانی بیست و چه‌ن ده‌ققه زیاتر بخه‌وێ و سواری ماشێن بێ، ره‌نگه رێگاکه‌ش هێنده دووپاته دیاری نه‌کردبایه. مژی دووهه‌می لێ دا و بێ ئه‌وه‌ی خۆی بیهه‌وێ خه‌ونی به‌ره‌به‌یانی بیر که‌وته‌وه. بۆ یه‌که‌م جار هه‌ستی کرد ژیانی پێ خۆشه، ته‌نانه‌ت ئه‌م ژیانه سڕ و بێده‌نگه‌ی خۆی. جگه‌ره‌که له ده‌ستی به‌ربۆوه و له سه‌ر ئاسفاڵتی شه‌قامه‌که چه‌ن تلێکی خوارد تا تگه‌ری ماشێنێک پانی کرده‌وه. دووکه‌ڵی جگه‌ره‌که‌ی له ده‌مییه‌وه سه‌رگڕی کرد و تێکه‌ڵ به هه‌موو دووکه‌ڵه‌کانی­تری شه‌قام بوو. ئه‌و ته‌نیا توانی بیر له‌وه بکاته‌وه که بریا نه‌مردبایه.

(۵)

ئه‌و رۆژه‌ش وه‌ک هه‌موو رۆژه‌کانی­تر پ.د له خه‌و هه‌ستا و به پێی خووی بیست و دوو ساڵ و سێ مانگ و حه‌فده رۆژه‌ی خۆی ساز کرد و له ماڵێ وه‌ده‌ر که‌وت، بۆ یه‌که‌م جار له رێگا بیری له ژیانی خۆی ده‌کرده‌وه. جگه‌ره‌یه‌کی ده‌رهێنا و مژی یه‌که‌می لێ دا. هه‌ستی کرد به زوویی ده‌مرێ، مژی دووهه‌می لێ دا و مرد.

زستانی ۸۲

انتشار توسط 8 تم

2 بۆچوون

  1. سلیمان ئەحمەدنژاد

    چیرۆکی چاک بوو دەسخۆش

  2. مەحموود محەمەدیان

    بژی کاک رەحیم،چێژم وەرگرت

بۆچوون بنووسە

ئیمەیلەکەتان نیشان نادرێت.خانە داواکراوەکان نیشانە کراون. *

*

*

دەتوانی ئەو تاگ و خەسڵەتانە HTML بەکاربێنیت: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>