هەواڵ

دوو شێعری ئارام فه‌تحی

ئارام فەتحی

۱

خەریکم ئێوە دەمرم لە خۆما

خەریکم بەرلەوەی ئایندە بێت بڕۆم

بەرلەوەی ئێوە بڕۆن، من بمێنم بۆ دڵتەنگی

خۆم دابنێم سەرما بخوات

نان بخوات

شەراب بخوات

غوربەت بخوات

خۆم دابنێم فێری بکەم نەترسێ لە تاریکی

لە گورگ

لە هەوای نەبوونتان

نەترسێ، ئەگەر تەمەن تەرجومەیەکی سەقەت بێ لە ژیان

خۆم دابنێم، فێری پەڕینەوە لە خیابان

خواردنی برنج بە چنگاڵ و

فێری زمانی تازەی تەنیایی بکەم

فێر بکەم چۆن دەست بۆ نەبوونی             کەسێک

کۆڵانێک

زرێبارێک ببات

لە کەریم کابانێکا

تەمەنی پڕ ئەسرینم بڕوات ملی خۆی بشکێنێت

ملی ئاو

من کە لە ئاو بێزار بم

ناتوانم ماسییەک لە خۆما داکوتم

حەوزێ لە خۆما قەتیس بم

من خەریکم دیوارێ لە ئێوە ئەڕووخم

گۆشەیەک لە من بکەنەوە، بۆ دانیشتنتان

ئێوە و خێری دنیا و قیامەتتان

هەمیشە کفرێکم لە خوای نەبوونتان تەواو نابم

 

۲

تەمەنێک هەڵچنم و

گلەیی چی پەنجەرەیە  با لە منا بنووزێنێ

خۆم لە منا بمرێ

بمرێ ئەو سەردەمەی تۆپێک بووم

بۆ شەقێک ئەگەڕام نەمکاتە گوڵ

بمرێ، ئەو مردنەی بەتەما بووم لە ئەزەلییەتا بمێنێتەوە

بمرێ منداڵیم

کە چاوی بڕیبووە گەورەکان

دووکەڵی من لەم دێڕەدا تەواو بوو و

دەسپێکی تۆیە ئەی غوربەت!

دەسپێکی ئەو کۆڵانەی درێژەی ئەڕژێتە ئێرە و

فریا بکەوم دامنەخەن

من قەرزاری پاییزێ

من قەرزاری ئاو

قەرزاری نیشتمان

ئەمەوێ نەختێک شەهید نەخەوم

نەختێ وشکی، نەمرم

نەختێ درەخت…

ئەمەوێ ڕووناکیم بگرمەوە لە تاریکییەکان

لە تەنیاییتانا دیاری بدەم

حورمەتی باوکیەتیتان

بە کوڕیەتیم بشکێنم

دار و بەردی ئەم شیعرە یاخییە و

جگەرەیەک نییە بتانکێشم

شتێک لە قوڕگی ئەم دێڕەدا گیری کردووە و

خوایەک نییە کفرتان بکەم

دیوارێک نییە بتانڕووخێنم

من چی خەونی خوایە     شەیتانم

چی خەونی کچە           پەردەم

کەسێک نییە بمدڕێنێ؟

کەسێک نییە لە مناڵیما بموێسێنێ و

گەورە بوون هەر بۆ ئێوە باشە!

گەورە بوون بۆ نەنکم باشە

کە فەخر بە تەنیایی خۆی بفرۆشێ

بۆ کچێ باشە

گوشادیی خۆی لە کوڕێکا داشارێ

من بچووکی ئەم تەنیاییەم

نەختێکم لە پیاسەی بەر لە مردن و

نەختێکم لەو ئاواتەی کەسێک فڕێی دام

کەسێک بەرلەوەی شووتم کا وتبووی

من بۆ بیرەوەری باشم

کەسێک گۆڕی خۆی لە منا هەڵکەندووە و

بڕیارە لە کوڕێکی ترا سپاسم بکات

کوڕێک، کە چی وشەیە لەوا مووسیقی بن و

چی گۆرانییە، لە منا بوەڕن

ئەی ماری خۆش ڕەقس

ئەوەتا من حەیوانێک ئەنووسم، لە خۆم ئەچێت

لە خۆم و لە تۆی مردووم ئەترسم

ئەگەر سەفەر نەتوانێ بمبا

 

انتشار توسط 8 تم

بۆچوون بنووسە

ئیمەیلەکەتان نیشان نادرێت.خانە داواکراوەکان نیشانە کراون. *

*

*

دەتوانی ئەو تاگ و خەسڵەتانە HTML بەکاربێنیت: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>