هەواڵ

کۆڕی رەخنه و لێکدانه‌وەی غه‌زەله‌کانی سێ غه‌زەلنووسی بۆکانی به‌ڕێوە چوو

سیروان ئەولازادە، لوقمان پیربادینی، جەلال نەجاری

سیروان ئەولازادە، لوقمان پیربادینی، جەلال نەجاری

رۆژی شەممه ۲۶ی بەفرانبار دووهەمین دانیشتن لە زنجیرە دانیشتنەکانی ئەنجومەنی ئەدەبیی بۆکان لە زستانی ۹۴دا ، بەرێوە چوو. ئەم دانیشتنه تەرخان کرابوو به خوێندنەوە و لێکدانەوەی غەزەلەکانی سێ غەزەلنووسی لاوی بۆکان بەرێزان جەلال نەجاری، لوقمان پیربادینی و سیروان ئەولازادە.

لە سەرەتای کۆڕەکەدا ، پێشکەشکاری بەرنامەکه رێزدار مەحموود محەمەدیان پاش بەخێرهاتنی ئامادەبووان و ئاماژه به کار و چالاکییەکانی ئەنجومەن ، داوای لەو سێ شاعیرە کرد هەر کام چەند غەزەلی خۆیان بۆ ئامادەبووان بخوێننەوە.

لە پاش خوێندنەوەی غەزەلەکان ،بەرێزان یونس رەزایی و ئەحمەد چاک بۆ رەخنه و لێکدانەوەی بەرهەمەکان بانگ کران. رێزدار یونس رەزایی باسێکی چڕوپڕی لەمەڕ نوێ بوونەوەی شێعر لە ئێران و کوردستان هێنایه ئاراوە و لە کۆتاییشدا پەرژایه سەر دەقی ئەو سێ شاعیرە و هەندێک لە تایبەتمەندییەکانی ئەو دەقانەی لێک داوە.

هەر وەها رێزدار ئەحمەد چاک باسێکی لە مەڕ سەرهەڵدانی غەزەل و تایبەتمەندییەکانی ئەم فۆرمه شێعرییه لە ئەدەبیاتی فارسی و کوردیدا ئاراسته کرد و لە کۆتایی قسەکانیشیدا ئاماژەی بە هەندێ خاڵی تایبەت لە شێعری ئەو شاعیرە لاوانەدا کرد.

بۆ خوێندنەوەی دەقی وتەکانی رێزدار یونس رەزایی لەسەر ئێرە کرته بکەن.
بۆ بیستنی را و بۆچوونەکانی رەخنەگران لەسەر ئێرە کرته بکەن.

ئەو غەزەلانەی لە کۆڕەکەدا خوێندرانەوە :

غەزەل : سیروان ئەولازادە
۱
شەرابی چاوەکەت خەست و منی ماتەم‌زەدە خەستە
لە مەیخانەی حزوورت‌دا بڵێ بمرە و مەڵێ هەستە
لە سووچی کون‌کونی سنگم ئەوینی تۆ نەبێ ئازیز
جیهان قەبرێکی تاریکە و بەشم مەرگێکی بێ‌هەستە
هەزار خۆزگەم بە دنیای بێ سنووری ئەو دڵەی تۆ کا
لە شارۆچکەی دڵی ئێمە هەموو کۆڵانێ بن‌بەستە
سەرابی زیندەگی ئەم‌لا و شەرابی لەززەتی ئەولا
گوڵم، قوربانی لیمۆی ئاڵ‌وواڵای کاڵی نەوڕەستە
ئەگەر دیتان بڵێن ساقیش نەیێتە ماڵی تەنیاییم
کەوا ئەمشەو دڵی «سیروان» بەبێ مێڵاکی مەی مەستە
۲
ئەم دەروونەی وا هەموو سووچێکی جێ زامێکی تۆن
ئاوەدانی شێعری تازە و داڕماوی عەشقی کۆن
هێندە ڕۆژووی ئەو سکووتانەت بە سەردا دامەوە
ئێستە کوفرانی غەزەل واژەی هەموو هاواری تۆن
شەو شەرابی چاوەکەت نەڕژێتە کاسەی یادەوە
غوربەتی بێ تۆییەکانم دڵ لە سینەم‌دا دەخۆن
بۆنەیێکم بۆ نەیی دڵ غەیری تۆ دەس ناکەوێ
غەیری تۆ دنیا هەموو تاریکییە، بێ ڕەنگ و بۆن
عارفی پرچی شەوت مەستی مناجاتی تەڕە
وشکەسۆفی غافڵی چاوت لە نوێژی نیوەڕۆن
پێم لە دووریت مردنم بۆ چاوەکانم دەرکەوت
وا بە فرمێسک خەریکن هەیکەلی زارم دەشۆن
پێی وتم «سیروان» مەبە دەربەندی عەشق واوە چۆ
فەرموو سەیرێکی جەماڵت کە و بفەرموو ئاخە چۆن؟
 
۳
کاتێ دەستت نایە دەستم، ئیدی دڵ تەنیا نییە
ئیدی عومرم تۆز و خۆڵی بەر ددانی با نییە
کاتێ دەستت نایە دەستم، چوومە نێو هەرمانەوە
بوومەتە ڕۆحانەتی وێڵی سەعات و سانییە
تا هەسارەی بەختی خۆم دیوە بە گۆناوە دەڵێم
ڕۆژی ڕووناکیش شکور ئەستێرە ناپەیدا نییە
پێی وتم چاوت وەتەنمە، لێی تەعەجوب مامەوە
سەیری ئەسرینم کە ئازیز خۆشەویستی وا نییە
پێی وتم «سیروان» چاوانت ئەگەر ڕۆژێ نەبێ
هەر لە بێ ئاوی دەخنکێم، ماسی بێ دەریا نییە
۴
وا مەزانە پیر بووم عەشقت لە سینەم دەردەکەم
داری پاییزم گوڵم، کوا تازە من گوڵ دەردەکەم ؟
گەر وتم زاڵم لە وەسفی هەر کەسێ بێ ناکەسە
زیز مەبە، چونکە حسابی تۆی گوڵم لێ دەردەکەم
عەشقی تۆ شاراوە حەیفە، ئیدی بە نیازی ئەوەم
بووکی ئەم هەستە لە پەردەی شەرمنا بێ پەردە کەم
سەر لە سەر باڵنج و پرچت وەک خەیاڵی من بڵاو
کەی لە ئەسراری شەوی پرچت ئەمن سەر دەردەکەم
خۆزگە گوتبایەت بە باڵنجی گەرم لاچۆ دەبا
سەر لە سەر سنگی کڵۆڵی ئەم هەناسەسەردە کەم
تاجری سەرمایە دزراوم لە بازاری ئەوین
گەر دڵیشم پێ نەمابێ خۆشەویستی هەر دەکەم
گەردن‌ئازادی نەکرد و ڕۆیی دەیزانی کە وا
ئارەزوومە ڕۆژێ دەس لەو گەردنە بێ‌گەردە کەم
کاتێ ڕوو دەگری گوڵم بڕوا کە چۆن دەگری دڵم
خوێنە ئەسرین و کوڵم ئەی دڵبەرە دڵ بەردەکەم
شەرعی ماری هەر بە داری بوو کەچی دەیگوت کە بەو
داروماری قەدد و پرچەم، تاروماری سەر دەکەم
هەروەکوو سیروان دەڵێم سیروان لەگەڵ ڕازی دڵم
سەر له سەر سنگی زەوی ڕوو لەو تەلان و هەرده کەم
۵
هه‌رێمی ته‌نیایی
چۆن به‌جێ دێلی هه‌رێمی شه‌که‌تی ته‌نیایم؟
چی بکه‌م من له‌ ئه‌وین و خه‌می بێ کۆتایم؟
چرکه‌یه‌ک ناچی له‌به‌ر چاوی چه‌واشه‌ی سوورم
گه‌رچی دووری له‌ منی غه‌مزه‌ده‌ لێره‌ی دایم
گه‌ر نه‌بی رۆچنی رووناکی هه‌موو به‌سراوه‌
تازه‌ روون نابێ به‌ که‌س تاری شه‌وی بینایم
گه‌ر تۆ سنگت له‌ ئه‌وین و خه‌می من نامۆیه‌
بۆچی هاتویه‌ته‌ ئامێزی دلی سه‌ودایم؟
خۆ له‌تۆی ئاوێنه‌ دا بێجگه‌ له‌ خۆ نابینم
بۆچی پیت وایه‌ له‌خۆ راییه‌ من خۆ بایم
هێنده‌ سیروان که‌ به‌ دنیاکه‌ته‌وه‌ ئۆگر بو
ده‌ردی کۆچی تۆ مه‌گه‌ر لاچێ به‌ کۆ چی دوایم
۶
ئه‌گه‌ر هاوار له بووغزم دا سکوتی کرد و حاواوه
به ئه‌سرینم ده‌شۆم گه‌ر هه‌یکه‌لی ئه‌م ژینه ژاکاوه
ئه‌گه‌ر جاده له هه‌نگاوم ده‌دا و ده‌مبا به‌ره و ناشوێن
دڵی شێت و مه‌لی فکرم به‌ڵام لای تۆ به‌جێ ماوه
ئه‌گه‌ر شیوه‌م له شێواوی خه‌به‌ر نادات و ئارامه
گڕی عه‌شقت به ڵام جه‌رگم ده‌سوتێنێ به شاراوه
په‌ری جارێ له دیوانم په‌ڕی شێعرێ له به‌رکه چوون
هه‌مو سه‌رچاوه که‌ی عه‌شقه و هه‌مو ئێحساسی پاراوه
خه‌یاڵی خاڵ له نێو چاوم له به‌ر لا فاوی ئه‌سرینا
چ فکرێکه که‌ هه‌ر ناچێ؟چلۆن نه‌قشه‌ که هه‌ر ماوه؟
ئه‌تو ئه‌ی زه‌ردی پرچت تیشکی تیرێژی شه‌وی ژینم
له رویشتن که‌یه‌ک لا بوی دڵم ده‌شکا له سه‌د لاوه
به یادی پرچه تێک ئاڵاوه‌که‌ی سه‌ر رومه‌تت ئازیز
سه‌ری رشته‌ی خه‌یاڵاتم هه‌مو ئاڵۆز و شێواوه
گوڵم پڕشنگ و تیشکی ئه‌و هه‌سارانه‌ی که ده‌یبینی
به‌یانی کاتی هه‌ستانت له خه‌و دا پاکی تاراوه
چ تۆفانێکی خوێنینه هه‌میشه چاوه که‌م دوربێ
له بێ بن ئاسمانی شینی چاوانت که هه‌ر ساوه
غەزەل : لوقمان پیربادینی

۱

«تاسە»
من لە كانی سەرەڕێی گوندەوە چاوەڕوانم
لابدەیت و شەكەتیت دەرچێ هەڵۆی شاخانم
چاوی من فێرێ ئەتۆ دیتن و تۆ ویستن بوون
ساڵی جارێك وەرەوە دەردو بەڵات لە گیانم
كاكەشانێكە لە چاوی گەشی ئەم مانگەشەوە
دزەڕێی لاقەد و داوێنی چیا و كوێستانم
ڕێ، چپەی لێو و خشەی پێتی بە ڕووبارا نارد
گوێ، بە هەستی وشەیەك ، بێی و بڵێی میوانم
ویشكە لێوی قەڵەشیوی زەوی بێ نازی دڵم
چاوەڕێی ماچی تەڕ و بۆنی گڵ و بارانم
وەك نیگای شەرمنی پەنجێرەیەكی چاوەڕوان
تینوو بە ژوانی كچ و بۆنی گوڵ و ڕیحانم
شار بە بۆی دووكەڵی سیگارو گڕاس خنكاوە
من لە ناو ئەم خەفەت و دەردەوە لێت دەڕوانم
دێ،لە تووش بوون بە پەتا لێرەوە شەو بێدارە
بۆیە هێمایە چرای نیوەشەوەی كۆڵانم
بێ مرادە كەژوكۆ و سەوزی سرووشت بێ باڵات
وەرە ساڕێژكەرەوەی زامی دڵی پڕژانم
دڵەكەم باخێ بە پانتایی هەموو دنیایە
باخەوانم ! وەرەوە، تۆ كە ونی وێرانم
تۆ كەسێكی كە بە قەد خاك و وڵات ئاشقتم
چاوەڕێی پێڕەوی تاریكە شەوی جێژوانم
لێرە باڵدار چلەبڕ بوون و هەوا گۆڕاوە
بورجی ئەشقە وەگەڕێ ، ئاشقەكەی جارانم
تۆ هەواڵت وەكوو ڕووبار و بەهار بێ خەوشـە
دێ بە سەربەستی شنەی ، بۆ من و بۆ یارانم
ڕێگە نەرمانە، چڕیش بێ بە مژۆڵ دەیماڵم
پێ لەچاوم نێ منیش بستێ لە كوردستانم
كۆلكەزێڕینە لە شوێن پێی سەفەرت جێماوە
بۆم لە گوڵ داوی هەتا دێیەوە شۆڕش وانم.
۲
ئاسۆی جوانی
من كە ژینم كرد بە فیدای نیونگای  ئاوڕێكەوە
دەركی ئاوازی  ئەوین و خۆشەویستیم لێكەوە
هەر چی تۆ ویستت بە چاوی شێعرەكانم سوێند ئەخۆم
پێت  ببەخشم لەم ژیانە هاوسەفەر بین پێكەوە
بێرە كاروانی بەرەی بێشەرمی جێگەت خاڵییە
پەنجە  بنگێوە لە پەردەی شووشی پەرداخێكەوە
تێكە با هەڵدەین و نم نم تێك شكێ  واژەی شەرم
تاكوو خۆشیمان دەچێتە كردەوەی مەستێكەوە
هێشتە پێم وایە خەیاڵ و خەونە ، تۆ هەر سێبەری
ساقی خۆشبەختیم وەرە  تا دەمگرێ  بۆم تێكەوە
لێوەكانم  خەز  لە تامی  تووفەڕەنگی  كاڵ  دەكەن
بەو خەیاڵە  پەنجەكانم  چوونە  بێستانێكەوە
چاوەكانم  لێ  بە جێماوە  لە  ئاسۆی  جوانیا
لەو بەرۆك و مەمكە‌تا ماچێكی شێتم جێكەوە

۳

كۆنەیار
دەفتەری ژین ، بێ عەشـق، بێ ڕەنگ و بۆنە، كۆنەیار
زۆر لە خۆم پرسیـوە ئەحواڵـت چلۆنە ، كۆنەیار
تامی زارت زۆر لـه بۆنی خاك و بارانـه دەچـێ
مەرهەمی ئازار و ئێشـی زامی كۆنە،كۆنەیار
پەرچەمت تاڤـگەی هەتاو، مەمكت دووماسی دەستەمۆن
خەنجەری دوو سەربڕی جەرگی بەسۆنە، كۆنەیار
قەت نەبوو جارێ بریسـكەی ژانـی شێعری من نەبی
هەرچی دەیڵێم ، هەر خەمـی دیداری خـۆنـە، كۆنەیار
ســۆز و هـەســت ڕێبواری تینووی كانی عەشقـت بوون گوڵم
هـێـشـتـه پاراوی ئەوینی بەرزی تـۆنە، كۆنەیار
چـوومـە‌ ئـەو شـوێـنانە وا دڵمان دە گۆڕییـەوە بە یەك
ئـێسـتـە بێ چرپـە و خـشە و بێ هات و چۆنە، كۆنەیار
كۆپـلەیـەك قاقا لەگــەڵ ماچێـکی تەڕ جـێمـــاوە لێــــت
تــۆم لە‌گەڵ نی، بــەردی دیـــوار، مـڕچ و مۆنە، كۆنەیار
ئــەو سـرووشـتـەی پـڕگـوڵە و تێـكەڵ بــە ئـاوازی مـەلان
نـاگەنــە جــووانـیـت، وەكــــوو پیـنـه و پـەڕۆنـــە، كۆنەیار
داڵی بــرسی لەو هەرێـمە كـۆترێكی گرتووە
چـاوەكانم دێـڕە شێـعـری شین و ڕۆنە، كۆنەیار
تا حەشر ئەو شـوێنە وا پێیدا ‌‌‌‌دەڕۆی خـۆشـم دەوێ
چاوەكانـت پێم دەڵێن دڵداری چۆنه، كۆنەیار
۴
ئێوارەی كۆڵان
ئەودەمانەی دڵەكەم كێشی دەكردم بۆ لات
بۆنی كۆڵانەكەتان مەستی دەكردم،بە خودات
نازی ئێوارێ لە كۆڵانی  پڕی قاقا‌دا
چەكەرەی ئەشقە لەناو باخی دڵم‌ خونچە دەكات
ئێستە ئەو كاتەیە تەرزەی بزەیە و مەرگی خەم
خولەكێ دوانی  ترە من دەگەمە  بەر درگات
پەردە ئەو كاتە شكۆی پەنجەتی هەست كرد، شێت بوو
باوشی كردەوە پەنجێرە لە گەڵ خۆی بتبات
هەست و پیت و وشە دەستەو نەزەرن، ڕاماون
تاكوو ئیلهام بێ لە نێو شێعرەوە جوانیت دەرخات
دەربڕین  شەرمن و هەڵبەست و شێعر لارە ملن
ئەو دەمەی دەستێ لە پەنجێرەوە ماچێ هەڵدات
                                                                         بۆكان ١٥/٥/٩٣

۵

وێستكەی سەفەر
لە غەریبیت گوڵەكەم تا كوو مژۆڵی چاوم
نوقمی خوێنە و لە چەمی سووری سەفەر خنكاوم
دەستی  ماڵاوایی تۆ ماڵی دڵی ئاگردام
وام لە كۆڵانی  ئەوینا بەتەنێ  جێماوم
ڕووپەڕی سەوزی ئەوینت بە شنەی شەرمە بزە
نارد، كەچی پێم نەگەیی بەختی بەڵا  لێ داوم
هەرچی خۆشم دەوێ دەستێكی ون و شاراوە
بەدزی زەوتی دەكا بۆیە لە تۆش ترساوم
ڕەنگی سەد جۆرە گوڵم دیوە لە چاوانت دا
بۆ بەرامەی حەزی نێو باوشی تۆ تاساوم
تەمەنی  گوڵ وەكوو خۆشی دڵی من كورت و كەمە
تا چەلێ پێدەكەنم سەد كەڕەتان گریاوم
من لە وێستگەی سەفەرا تاوەكوو دێی چاوەڕوان
ڕووبەڕووی كورسی هەمیشەت، چ سەیر وەستاوم
چاو لە چاوم كە دەكەی، پێدەكەنی وەك باران
وەرە پاراوی كەوە،باخی دڵی بێ ئاوم
۶
دەزانی
دەزانی چەن حەزم لێتە دەزانی؟
دڵم شەیدای خشەی ڕێتە دازەنی؟
پەپوولەی سەركەش و شێتی خەیاڵم
شەو و ڕۆژ قاسیدی ڕێتە دەزانی؟
دڵم كۆشكێكە پەنجێرەی بەرەو ڕووی
شەقامی هات و چۆی ڕێتە دەزانی؟
ئەوەندە ڕووبەڕووی ماڵتان چەقیوم
هەموو خەڵكی دەڵێن شێتە دەزانی؟
نەبوو جارێ لە دەروازەی دڵم دەی
بپرسی كێ دراوسێتە دەزانی؟
غەزەل : جەلال نەجاری

 

۱
گوڵـ‏م دڵم پڕە له … هیچ، ئەرێ ئەزانی شارەکەت؟!
ئە‏مێسته چۆڵ و هۆڵ، بێ هە‏را …نه تۆ نه دارەکەت!
که سێبەری ئەکەوته حە‏وشە‏مان، نه کۆترێک نه کەس!
که بێته کووچه … کایە‏یە‏ک … ! نه زەردەیە‏ک له زارەکە‏ت
که وەک پەپووله هە‏ڵفڕی به باڵی سە‏وز و سوورەوە !*
بەرەو پیادەرەو بەرەو شە‏قامه نادیارەکە‏ت !
ئەمێسته ئەم وەتاغه
من
دیازپام
خە‏ون
مەرگ…
نه نووکەیە‏ک ، له تاکه زەنگە‏کانی جار و بارەکە‏ت !
له بیرته پێت وتم : ئە‏بێ بڕۆم ، ببوورە تۆ له بیر … !
که داکە‏وت له دەسته زەردەکانی من
         هه
‏                نا
                     رە
                         که ت‏…
تلۆر تلۆر، بە‏رەو پیادەرەو … وتت : ببوورە لێم
ئەبێ …
ئە‏بێ بسڕمە‏وە …
بسڕمەوە ژومارەکە‏ت !
گوڵم
دڵم پڕە له دەرد و کوڵ
ئەڵێم بڕۆم له شارەکە‏ت…!**
زستانی ۸۹

 

۲ 
“قوربانی تۆزی رێگه‌تم ” ئه‌مڕۆ رژانه‌ سه‌ر
جه‌سته‌ی پیاده‌ره‌و که‌ هه‌موو دانه‌ دانه‌ سه‌ر …
که‌وتن به‌ سه‌ر کراسه‌که‌م ئه‌ی تاکسی ئه‌رێ؟
چه‌ن ساڵی تر که‌ چویته‌وه‌ بۆکان بزانه‌ سه‌ر …
کووچه‌ی هه‌ناره‌که‌م که‌ له‌ ده‌ستم که‌وت …!! بڵاو
بۆوه‌ و قیامه‌تێ … ! چ عه‌رز که‌م ؟ ئه‌مانه‌ سه‌ر …
هاتی منن ، منێ که‌ له‌ ئێواره‌ ئه‌ی خودا !
دۆزه‌خ نه‌ما نه‌چم کوره‌ تف له‌و ژیانه‌ سه‌ر …
باری هه‌تا قیامه‌ت و تا مه‌رگ و تا هه‌نار!
ئه‌ی تاکسی ببووره‌ که‌ وا ئه‌م قسانه‌ سه‌ر …
دێنێته‌ ئێش و وه‌خته‌ ته‌نانه‌ت ئه‌گه‌ر بڵێم :
“دڵ ره‌نگه‌ بێ به‌ ئاو ” و به‌ قورسێکی ژانه‌ سه‌ر
بیخۆره‌وه‌ و تکایه‌ بزانه‌ له‌ کووچه‌ دا
رووحێ که‌ هی ئه‌من بو له‌ ناو ئه‌م زه‌مانه‌ سه‌ر…
گه‌ردانه‌ دا که‌ ون بووه‌ بیدۆزه‌وه‌ و بڵێ :
قوربانی
تۆزی
رێگه‌تم …*
۳۰/۲/۱۳۹۰
تاران

 

۳
لەگەڵ غەزەل کە ڕدێنی لە من سپیتر بوو
وەڕەز ببوو کە ئەوەندەی گەڕا لە شاران و …
لە دووکەڵی جگەرەمدا لە خۆم لە ئێوارەی
پیاسەکانی غەریبیی لە ناخی تاران و …
پەپوولەیەک کە ئەمن بم لەگەڵ ئەتۆ ون بووم
شەوێ کە تاکو بەیانی شەراب و باران و …
قەسیدە بوو کە دەباری بە سەر دڵی مندا
بەپێکەنینەوە هاتی بە یادی جاران و …
شەوانی پێکەوە بونمان و باوەش و ماچ و …
لە باخەکانی مەمکدا لەگەڵ هەناران و …
#
لە ئێرە بوو کە لە پڕدا وتت: کەسێ خۆی کوشت
کەسێ کە تا کو بەیانی شەراب و باران و …
قەسیدەیەک نەدەباری بە سەر دڵی ئەودا
بە خەنجەرێک کە بریقەی لە ناو دڵی شەودا
حەکایەتێکی سپی بوو لە پێخەفی خوێنا
عەشیرەتی رەشەباکانی سەرزەوی دێنا…
…یه بەر خەیاڵ و لە رەنگ و رواڵەتی مەرگا
نوقم ببوو وە تەنانەت لە حاڵەتی مەرگا
پەپوولەتر لە ئەتۆ بوو لە گەڵ ئەتۆ ون بووم
بەیانیەک کە بەتەنیا غەزەلترین ژن بووم
جەهەننەمێکی سەیر بوو شەوانی بێ تۆییم
بە پێکەنینەوە هاتم لەگەڵ ئەتۆ رۆییم
بە کافەکانی شێعردا لە کاتی ئێوارەی
پیاسەکانی غەریبیی کەسانی بێ‌پارەی
کەسایەتی یەکەمی چەند فلیمی بێ‌مانا
کە قارەمانی عەشق بوون لە سینەماکانا
بە باخەکانی هەنارا بە مەمکەکانمدا…
بە لەززەتێ کە هەر ئێستەیش لە بن ددانمدا…
#
لە ئێرە بوو کە لە پڕدا وتم : کەسێ خۆی کوشت
هەر ئەو کەسەی کە لە خۆڕا بەیانیەک تۆی کوشت!
زستانی ۹۲
 
۴
رووحی به‌دفه‌ڕ
به‌یان ئه‌نگوت و شه‌و ڕابرد و من رووم
له تۆیه سیبه‌ری رووحی بزربووم
که ڕاماوی له جه‌سته‌ی نیوە زیندووم
شه‌ڵاڵی شاوەت و میز و گه‌ن و گووم
وە دەڕوا بۆگه‌نیوم رۆژەرێیه‌ک
خه‌یاڵ دەمخاته کاف و واو و زێیه‌ک
خرینگه‌ی بازنه‌کانت دێن له‌ جێیه‌ک
له‌ سووچی مسته‌ڕاحێکا که که‌وتووم
وە پاڵم داوەته مێژووی جیهان و
دروشمی شۆڕشی ئێستاکه‌مان و
بژی حزبی هه‌موو چه‌وساوەکان و
لە ژێریا : “ملت محروم و مظلوم…”
#
دەبێ بڕشێمه‌وە ئه‌ی رووحی به‌دفه‌ڕ
له شۆڕشدا لە جه‌رگه‌ی شیوەن و شه‌ڕ
له سه‌ر شوسته ته‌نانه‌ت کاتی دەسپه‌ڕ
ئه‌من ئه‌ی نیشتمان عومرێکه مردووم…
پووشپه‌ڕی ۱۳۹۳
۵
شەو و شەقام و کیوسک و … ئەلۆ … ئەلۆ… خانم ؟
ژومارەکەت بـ..بـبوورە … له گیر … له گیرفااااانم
هەزار و یەک شەوەزەنگی تەوااااو بەستەزمان
وە چاوەڕێ لە سەدایەک … هەتا سەر ئێسقانم
درۆ نیه نه به وەڵلا… بە مەرقەدی هەرمێ
دەنا دەلێی بە سەری کێ بڵێم … بە ویژدااانم
ئەوا منم له تەریقەی هەنارەکانی ژن
ئەوا منم لە عەشیرەی… ئەرێ دە چووزانم!!!
تکا دەکەم دە مەڕۆ نا… ببوورە هەر ویستم…
بڵێم : شەوێ کە لە خەوما ببوویه میوانم
ئەرێ گوڵم، دڵەکەی من ئەوا بە جێ ماوە
هەناسەکەت لە لەشمدا ، سەرت لە سەر شانم
ئەلۆ؟!
ئەلۆ؟!!
خانم؟!!!
خەرمانانی ۹۳
۶
کاتێ له شەڕ گەڕامەوە
کاتێ له شەڕ گەڕامەوە رووحم ببوو به “با” و
سەنگەر به سەنگەری خەمەکانم هەموو گەڕا و
داڵدەی نەبوو له شاااخ تەنانەت له نااااخدا
وێرانەیەک له حەز له شەهیدێکی دەرکراو
کاتێ له شەڕ گەڕامەوە ئێوارە بوو وە من
وەک سێبەری قەڵافەتی پیاوێکی داڕماو
رووم کردە شاااار ،ئااااای له ویترینی رەنگەکان:
رێبوارە تووڕەکانی خیابان سڵاو… سڵاو
شێوەم ئەکەن؟! منم ! “حەمه بچکۆل”ی سەر شەقام
منداڵەکەی گەڕەک که لە سەرتان ئەنا کڵاو
هاتوومەوە له شەڕ!! به لەشی ئەنجن ئەنجن و
دوو دەستی جوانەمەرگ و به رووحێکی سەربڕاو
ئێستااااش ئەی هەرێمی هەموو وەرزەکانی من
ئەی نیشتمانی بۆگەن و ئەی دۆزەخی گڵاو
من “مامه شیشە”تم “که له ئاسۆی بڵندی تۆ”
بەربوومەوە و به سینگی خیابانەوە بـ    ڵ   ا   و…
کاتێ له شەڕ گەڕامەوە ئەمدی له دوورەوە
ئەی نیشتمانەکەم که به ئاڵاتەوە هەتاو…
ئاوا ئەبێ له بەرزەخی ئێوارەدا و دڵم
“لەم شەرحی دەردی غوربەتەدا وەخته بێ بە ئاو”
هاوینی ۹۴

 

انتشار توسط 8 تم

بۆچوون بنووسە

ئیمەیلەکەتان نیشان نادرێت.خانە داواکراوەکان نیشانە کراون. *

*

*

دەتوانی ئەو تاگ و خەسڵەتانە HTML بەکاربێنیت: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>