هەواڵ

هاوشێوەكانی سەلیم جەودەت / مه‌حمود نه‌جمه‌دین

مەحمود نەجمەدين

هاوشێوەكانی سەلیم جەودەت

مەحمود نەجمەدین

دوای سێ‌ مانگ لە پرۆڤەكردن، گروپی شانۆیی (رەش) بڕیاریاندا ۲۹-۹-۲۰۱۰ یەكەم رۆژی نمایشكردنی شانۆگەرییەكەیان بێت. ( شانۆگەری دەنگی پێی مردن دێت) بە پێچەوانەی شانۆگەرییە كۆمیدییەكانەوە رێژەیەكی زۆر كەم لە خەڵكی چاوەڕوانی نمایشەكە بوون، شانۆگەرییە تراژیدییەكان هەمیشە بینەریان كەمە، ئەم وڵاتە عاشقی پێكەنین و گاڵتەجاڕین، بۆیە ئەم جۆرە كارانە بینەری تایبەتییان هەیە. بەهەرحاڵ عیرفان ئەشڕەف دەرهێنەری شانۆگەرییەكە چەند رۆژێك بەر لە نمایشەكە، هەواڵی نمایشكردنی شانۆگەرییەكەی بە هەموو تەلەفیزۆن و رادیوێ‌ و رۆژنامەكان دابوو.

ئەو بەرەبەیانییە بەر لە دەستپێكردنی شانۆگەرییەكە، مردن بۆ كارێكی خۆی بە سواری ماتۆڕێكی بچووك گەیشتە شوێنی مەبەست و لە سەر یەكێ‌ لە شەقامەكانی ئەم شارەدا سەری لە شۆفێری تاكسییەك شێواند و ئەجەلی كەسێكی پێ‌ دەسنیشان كرد، بڕوانە ئەوە ئەجەلە یان رێكەوتێكی غەمگین، ئەو بەیانییە ئەگەر سەلیم جەودەت بە پێ‌ نەچووبایە بۆهۆڵەكە، رەنگە مردنی بۆ پەنجا ساڵی دی دواكەوتبایە. ئا لەم كاتەدا مردن دێتە سەرسەرم و ئەم رستەیەم بە زۆر پێدەنووسرێتەوە:

(كاتژمێر دەی سەر لە بەیانی رۆژی ۲۹-۹-۲۰۱۰ دواهەمین وێستگەی ژیانی سەلیم جەودەت بوو، لە هەر كوێیەك بووایە دەبوو بمرێ).

بینەران لە نێو هۆڵەكەدا دانیشتوون و چاوەڕوانی نمایشەكەن، عیرفان ئەشڕەف لەو دیوی پەردەی هۆڵەكەوە بێ ئۆقرە لەهاتوو و چۆدایە و بەڕوخسارێكی توڕەوە دەڵێت و دەڵێت: ” بۆ نەهاتی ئاخر سەلیم بۆ نەهاتی”. مۆبایلەكەی لەگیرفانی دەردێنێت و زەنگ بۆ سەلیم لێدەدات و كەس وەڵام ناداتەوە، عیرفان بە ڕوخسارێكی گرژەوە ڕوو لە ئەكتەرەكان دەكات و دەڵێت: “هەر لە خۆشی ناگرێت وەڵامم بداتەوە”. ئا لەو كەین و بەینەدا لە مۆبایلەكەی سەلیمەوە تەلەفۆنێك بۆ عیرفان دەكرێت:

– ئەلو، سڵاو، تۆ زەنگت بۆ ئەم ژمارەیە لێدابوو؟

– بەڵی، جەنابتان كێن؟ ئەوە موبایلی سەلیمە، ئەی خۆی لەكوێیە؟

– من ئەفسەری لێكۆڵینەوەم. بەر لەنیو كاتژمێر  ئاگاداركراینەوە كەسێك تاكسییەكی نیسان صەنی لێی داوە و ئەم مۆبایلە لە گیرفانیدا بووە.

– بەڕاستە، چۆن وا دەبێ‌، ئەی ئێستا چۆنە؟ لەكوێیە؟

– بەداخەوە بەرلە چەند ساتێك لەگەڵ گەیشتنی بۆ بیمارستان گیانی سپارد.

عیرفان ئەشرەف لەحەژمەتا سەری لێ‌ دەشێوێت، وەك ئەوەی دەور ببینێت، هاوار دەكات سەلیم مرد، لەهاواى وى خەڵكی ناو هۆڵەكە رادەچڵكێن و ئیتر دەبێت بە هەراو هۆسەیەك كەس كەسی نەدەناسی.

لەدوای مردنی سەلیم جەودەتەوە، دەرهێنەر بیر لەوە دەكاتەوە كە بۆ هاوشێوەیەكی سەلیم جەودەت بگەڕێت، زۆری لا مەبەست بوو كەسێك بدۆزێتەوە، كە شێوەی سەلیمی تێدا بێت، هەفتەیەك لەپاش مردنی سەلیم، لەو پەڕی نائومێدی و غەمگینییەوە، بەیانییەك وەك هەموو رۆژەكانی رابردوو لە ماڵ دەچێتە دەرەوە، بەو هیوایەی هاوشێوەیەكی سەلیم بدۆزێتەوە. هێندە بەنێو بازاڕەكاندا دەگەڕێت، هێندە لەڕوخساری پیاوەكانی نێو بازاڕ دەڕوانێت ماندوو دەبێت. كزە با یەكی فێنك لەرزی لێ‌ دێنێت و ئیتر نائومێدانە ڕوو لەیەكێ‌ لەمەیخانەكانی شار دەكات، بە مەبەستی خواردنەوە. لە پێچێكی تاریكی مەیخانەدا دادەنیشێت، هێشتا شاگردی مەیخانەكە بەرۆكی نەگرتووە، لە سەر یەكێ‌ لەمێزەكان ڕوخساری كەسێك دەبینێ‌، دەقا و دەق لەسەلیم جەودەت دەچوو، بینینی ئەو كەسە خۆشبەختی كرد، كاتێك شاگردی مەیخانەكە لەبەردەمیدا قووتبووەوە تا داواكارییەكانی بۆ جێبەجێ‌ بكات، عیرفان ئەشرەف بەبێ‌ ئەوەی روو لەشاگردەكە بكات، وتی:

– دوو بیرەو چارەكێ‌ ویسكی و قاپی نۆكاوم بۆ بێنە.

عیرفان جگە لەمەزەكە، هیچی نەخواردەوە، نەیدەویست سەرخۆشبێت، بۆ ئەوەى ئاگای لەهاوشێوەكەی سەلیم جەودەت بێت، ئێ‌ ناشبێت هیچ نەخواتەوە. بەردەوام نۆكاو و مەزەی دەخوارد و چاودێری هاوشێوەكەی سەلیم جەودەتی دەكرد، لەچاوەڕوانی هەستانیدا ئۆقرەی لێبڕابوو، هاوشێوەكەی سەلیم پیاوێكی خۆش مەشرەب و گاڵتەجاڕ بوو. بە پێچەوانەی سەلیمەوە ویسكی خۆرێكی عەجایب بوو. كاتژمێر گەیشتە یانزەی شەو، هاوشێوەكەی سەلیم لەگەڵ هاوڕێكانیدا بەسەرخۆشی لە مەیخانەكە چوونە دەرەوە، هەریەكە و بەلایەكدا رۆیشتن. عیرفان ئەشرەف كەوتە دوای هاوشێوەكەی سەلیم. ها لێرە، ها لەوێ‌، ماڵی خۆی بۆ نەئەدۆزرایەوە، هەرجارە لە دەرگایەكی دەدا و خاوەن ماڵێك پاڵێكی پێوە دەنا و بەپشتا دەكەوت. عیرفان هەر بە دوایەوە بوو. ئەو شەوە هاوشێوەكەی سەلیم تا بەرە بەیان هێڵنجی ئەدا و خەو ئەیبردەوە، ئەی ناڵاند تاوێك ئەڕۆیشت و ئەكەوت. بەرەبەیان  لەپاڵ دیواری كۆڵانێكدا خەوی لێ‌ كەوت. عیرفانیش چەند هەنگاوێک  لەو لاترەوە شانیدا بەدیوارێکەوە. لەچاوەڕوانی بێداربوونەوەی ئەودا، جگەرەی ئەكێشا و لەسەرما هەڵدەلەرزی. هاوشێوەكەی سەلیم وەك ئەوەی لەسەر دۆشەكێكی لۆكە نووستبێت، تا كاتژمێر دەی سەرلەبەیانی خەوت. كاتێك بێداربووەوە، عیرفان چوو لایەوە و سڵاوی لێ‌ كرد. هاوشێوەكەی سەلیم بەخەواڵوییەوە وتی:

– تۆ كێی ؟ چیت دەوێت؟

– هیچ، حەز ئەكەم یارمەتیت بدەم.

– بۆ من چییییییمە چیمە، تا تۆ یارمەتیم بدەیت؟

– تۆ هەستە با بڕۆینەوە بۆ ماڵ.

–  ناچمەوە ماڵ تازە بۆ بڕۆمەوە؟ تێرخەو بووم.

– باشە كەس و كارت نییە؟ كەس بە دواتا ناگەڕێت؟

– پف كەس و كار….!

لەو رۆژە بەدواوە عیرفان ئەشرەف زیاتر لەمانگێك چاودێری هاوشێوەكەی سەلیمی ئەكرد، ئەیویست دەرفەتێك بقۆزێتەوە و تێیبگەێینێت كە كارێكی وەها گرنگی پێیە. ئەو دەرفەتە هەڵنەدەكەوت وهەمیشە سەرخۆشبوو.

هاوشێوەكەی سەلیم پیاوێكی تەمەن سی و سێ‌ ساڵ بوو. هەمیشە لەمەیخانەكانەوە بە مەستی شەو و رۆژی دەكردەوە. عیرفان ئەشڕەف لەهاوشێوەی یەكەمی سەلیم جەودەت نائومێد بوو. دیسانەوە بە نێو ڕوخسارەكانی بازاڕدا گەڕا تا سەلیم جەودەتێكی تر بدۆزێتەوە. ئەم جارەیان لەرێگای گۆڤارێكەوە، رۆژنامەنووسێكی  تەمەن سی و یەك ساڵی دۆزییەوە كە‌ لەگۆڤار و رۆژنامەکانى ئەم شارەدا وتاری ئەنووسی. هاوشێوەی دووەمی سەلیم ناوی ئیسماعیل بوو. بەئیسماعیلی هەمەچەشنە ناسرا بوو. ئەم نازناوەشی لەوەوە بۆ مابووەوە كە لەزۆربەی رۆژنامەكان وتاری بڵاودەكردەوە، وتارەكانیشی هەر یەك لەئاوازێك بوو. جارێك لە سەر كارەبا ئەینووسی و جارێك لە سەر نەوت و لە پڕ وتارێكی درێژی لە سەر هونەری شێوەكاری ئەنووسی. عیرفان بۆ ماوەی دوو هەفتە هەوڵەكانی خۆی خستەگڕ، هەرچی كرد سوودی نەبوو. ئیسماعیلی هەمەچەشنە بەدوو هەفتە مەشهەدێكی بۆ ئەزبەر نەكرا و  لەكاتی پرۆڤەدا عیرفان ئیسماعیلى هەمە چەشنەی بەپاڵ كردە دەرەوە، چەند رۆژێك لەپاش ئەو ئێوارەیە، لە گەشتێكیدا بۆ بازاڕی مریشك فرۆشەكان عیرفان پیاوێك دەبینێت مریشكێكی شامی لەباوەشدایە و لەدوای كڕیار دەگرێت. عیرفان كاتێك بەرەو رووی ئەڕوات، وا هەست دەكات ڕووبەڕووی سەلیم ئەبێتەوە، كابراش لای وایە كڕیارە. بەزمانێكی بازاڕی دەڵێ‌: وەرە حەوبرا مریشكی شامییە.

عیرفان پێی دەڵێت: مریشكەكە بایی چەندە من دوو ئەوەندەت ئەدەمێ‌، بەڵام بەمەرجێك كارێكم هەیە بۆم جێبەجێ‌ بكەیت.

هاوشێوەكەی سەلیمیش بە تامەزرۆوە دەڵێت:

– ئەمركە حەو برا.

– من عیرفان ئەشرەفم دەرهێنەری شانۆم پێویستم بەتۆیە دەورێكم بۆ ببینیت.

هاوشێوەكەی سەلیم قاقا پێدەكەنێت:

– وەڵاهی وامزانی موشتەریت، بەخوا عەنتیكەیە، یەعنی ئەمبەیتە ناو تەلەفزیۆنەوە.

– نا، نا ئەمە شانۆیە لە هۆڵدا نمایش دەكرێت.

–  رۆژی چەندم دەست دەكەوێت؟

– هیچ، ئەمە بۆ خزمەتی هونەرە.

هاوشێوەكەی سەلیم تا هێزی تێدابوو جڕتێكی بۆ لێدا. عیرفان خۆشی نەیزانی چۆن دەربازی بوو. دواهەمین هەوڵی عیرفان لەرۆژەكانی كۆتایی پاییزدا بوو. لە یەكێ‌ لەباخچەكانی شاردا هاوشێوەیەكی سەلیمی دۆزییەوە. ئەو هاوشێوەیەی سەلیم ناوی موراد سەمیربوو، تەمەنی سی و حەوت ساڵ بوو. هێندە لەسەلیم جەودەت ئەچوو، دەتگوت سەلیمە و زیندوو بۆەتەوە. موراد خوێنەوارێكی زیرەك بوو، بێ‌ ئیش و كار دەسووڕایەوە. هەمیشە لەدوای ئیش دەگەڕا. ئەگەرچی ئەو كۆلێژی ئابووری تەواوكرد بوو، وەلێ‌ خوێنەرێكی جددی ئەدەب و فیكریش بوو. ئەمە ئەو كەسە بوو عیرفان بۆی دەگەڕا. دەقا و دەق لەسەلیم ئەچوو. تەنها یەك چاویلكەی بەس بوو، بۆ ئەوەی ببێت بەسەلیم.

عیرفان ئەبووایە بەماوەیەكی زۆر كورت موراد فێری رۆڵ بینین بکات. موراد نەك هەر ئەو مەشهەدانەی تایبەت بوون بەخۆی بگرە تەواوی دەقەكەی ئەزبەرکرد، بەجۆرێك دەجووڵایەوە لەئەكتەرێكی شارەزای دنیای شانۆ دەچوو. دوای چەند مانگێك پرۆڤەكردن كاتژمێر دەی سەر لە بەیانی ۵-۱-۲۰۱۱ پەردە لادەدرێت و ئەكتەرەكان دەبینرێن. ئەوانەی بۆ تەنها جارێك بینەری شانۆگەرییەكانی گروپی شانۆی (رەش) بوون، لە بینینی موراد سەمیر سەریان سوڕما، وەك ئەوەی سەلیم جەودەت لە مردن گەڕابێتەوە.

ئەكتەرەكان:

– موراد سەمیر لە شوێنی (سەلیم جەودەت)، لە دەوری (حەكیمی خەیاڵی) دا، رێگا لەمردنی كچی سەرۆك دەگرێ..

– تاڤگە، كچی سەرۆك

– سەرۆك

– پزیشكەکە، كە كێبڕكێی حەكیمی خەیاڵی دەكرد

– مردن

دیمەنی یەكەم

(حەكیمی خەیاڵ) رووی كردووەتە سەرۆك و پێی دەڵێت” گەوورەم رێگام بدە من بەخەیاڵ مردن فریو ئەدەم و كچە تاقانەكەت رزگار ئەكەم، ئەتوانم لەخەیاڵدا هاوشێوەیەكی كچەكەت بخولقێنم و سەر لەمردن بشێوێنم.

پزیشكەكە :سەرۆك كۆمار تۆ پیاوێكی پێشكەوتووخواز و ژیری، ئەم پیاوە نەحەكیمە و نەپزیشك، لەسیحربازێك بەولاوە هیچی تر نییە. تۆ چۆن باوەڕ بەخورافیات دەكەیت.؟

حەكیمی خەیاڵ” تۆ قەسابی نەك پزیشك، تۆ ناتوانی چارەسەری خۆت بكەیت. سەرۆك تكا ئەكەم باوەڕی پێ مەكە، ئەمە هەر ئەو پزیشكەیە لە كاتی جەنگەكاندا بریندارەكانی بۆ چارەسەر نەدەكرا و ئەیكوشتن. بەڵێنت ئەدەمی هێزی گۆچانەكەی موسام هەیە بۆ رێگری لەمردن. سەرۆك: ئێوە چین؟ لاچن، دوور كەونەوە بەهۆی كێبركێی نێوانتان خەریكە كچەكەم لەیاد ئەكەن. خودایە یارمەتیم بدە، لە نێوان پەڕجو و عەقڵدا چارەسەرێ‌ بۆ كچەكەم..

كچی سەرۆك: ئاه، ئاه، باوكە ئازار كوشتمی فریام كەوە. مردن لەكراسێكی سپیدا بەڕوخسارێكی ترسناكەوە بەرەو كچی سەرۆك هەنگاو دەنێ‌ و ئەڵێت” شایەتمان بێنە كچی سەرۆك ئێستا دوا ساتەكانی تەمەنی تۆیە.

حەكیمی خەیاڵ لەو ساتەدا هاوارئەكات و دەڵێت” ئەی ئەفسانەی مەزن، ئەی پەرجوو یارمەتیم بدە. لەو ساتەدا حەكیمی خەیاڵ یەكەم سیحری خۆی ئەنجام ئەدات و دەسەسڕە رەشەكەی لەگیرفانی دەر ئەهێنێ‌، بە یەك ڕاوەشاندن كچێك لە وەهمەوە ئەخولقێنێ‌، كچێك كە هاوشێوەی كچی سەرۆكە، دەقا و دەق لەو ئەچێ‌.                         بەو كارەی حەكیمی خەیاڵ مردن سەری لێ‌ ئەشێوێت، كارئەكتەری (مردن) هێندە توڕە ئەبێت كە خەریكە حەكیمی خەیاڵ ئەكوژێت، بەڵام نا، ناتوانێ‌ ئەو فەرمانی مردنی پێ نییە و تەنها جێبەجێ‌ كەرە.                     مردن: خودایە یارمەتیم بدە، سیحرێكم پێببەخشە تا بتوانم ئەو نێچیرەت بۆ ڕاو بكەم كە داوات كردوە.            سەرۆك: مردن تكات لێ‌ دەكەم وازبێنە، بست بە بستی ئەم مەملەكەتەت ئەدەمێ‌ لەبەرانبەر ئازاد كردنی كچەكەمدا.   پزیشكەكە: گەورەم، جەنابی سەرۆك چارەسەری كچەكەت بەم دەرزییەی دەستی منە نەك بەو سیحر وخورافیاتانە. لەو كاتەدا پزیشكەكە بۆ لای كچی سەرۆك ئەچوو، مردن لە نێوان كچی سەرۆك و هاوشێوە سیحرییەكەیدا راوەستا بوو تا راستەقینەكەیان بدۆزێتەوە، حەكیمی خەیاڵ لەسەر كورسییەك دانیشتو و جگەرەیەكى داگیرساندبوو، ڕووی لە بینەرانی نێو هۆڵەكە كردبوو، دەیگوت  بڕوانن چۆن سەرم لێ‌ شێواندوون، نەمردن و نەپزیشك نا توانن كچی راستەقینەی سەرۆك بدۆزنەوە. سەرۆك لەبەردەم مردندا لەسەرچۆك دانیشتبوو وئەپاڕایەوە.                               ئا لەو كاتەدا، لەو چركە ساتەدا سەلیم جەودەت دوای ئەو چەند مانگە لەمردنى لەسەر شانۆ بینرا، جلێكی سەرتاپا قاوەیی لەبەردا بوو، وەك ئەو بەیانییەی كە مردن لە یەكێ‌ لەشەقامەكانی شار رێگای پێگرت. لەگەڵ دەركەوتنی سەلیم جەودەت، یەكەم كەس كە راچڵەكا موراد سەمیر بوو، بە بینینی سەلیم جەودەت ڕوخساری زەرد هەڵگەڕا و هاواری كرد” ئاوێنەیەكم بۆ بێنن.                           (مردن) و (كچی سەرۆك) و (سەرۆك) و (پزیشكەكە) و (عیرفان ئەشرەف) و بینەرانی نێو هۆڵەكەش حەپەسا بوون، دەمیان داچەقاندبوو. لەو ساتەدا (سەلیم جەودەت) دەستی نایە گەرووی (كچی سەرۆك). لێرەوە كەشی نێو هۆڵەكە بە تەواوی شێوا و بوو بەهات و هاوار و غەڵبە غەڵب. هەندێك لەترسا بۆ لای دەرگای هۆڵەكە ڕایان ئەكرد و هەندێك لەژێر كورسییەكانی نێو هۆڵەكەدا خۆیان حەشار دابوو. دەركەوتنی سەلیم جەودەت دوو خولەك زیاتری نەخایاند. لە دوای دوو خولەك ونبوو. (كچی سەرۆك) لە سەر زەوییەكە شل وخاو كەوتبوو. عیرفان ئەشرەف هاواری كرد: تاڤگە مرد، لەدوای ئەو ڕستەیەی ئەو دۆخەكە بە تەواوی شێوا، یەكێ‌ هاواری ئەكرد: “كچی سەرۆك مرد”. یەكێ‌ دەیگوت “تاڤگە مرد”.”نەمردووە بووراوەتەوە”. “مرد تاڤگە مرد”. “كچی سەرۆك مرد….”…

انتشار توسط 8 تم

بۆچوون بنووسە

ئیمەیلەکەتان نیشان نادرێت.خانە داواکراوەکان نیشانە کراون. *

*

*

دەتوانی ئەو تاگ و خەسڵەتانە HTML بەکاربێنیت: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>